Käve õkva katlaahjo kaemah, et kas vaest olnuq vaia puid pääle pandaq. Tulľ vällä, et olľgi õkva õigõ aig paar halgo alaq visadaq. Ütli tuupääle hindäette, et: "Umgi paras aig alaq pandaq puid." Ja jäi kullõma ja märkmä, kuis ma tuud ütle. Ütli sääntse intonatsiooniga, et edimädse sõna lõpp olľ korgõmb:
 |
| Näüdüs ütest kõrvajäänüst esiqmuudu nõsõva-sadava intonatsiooniga lausõst |
Naksi mõtlõma, et mille ma niimuudu ütle ja kas üteldü tähendüs või tuun olnuq vähä tõõnõ, ku ma ütelnüq ilma seo korgõmbasminemise jõnksuldaq. Mullõ tunnus, et ku ma ütle taad ilma jõnksuldaq, sis um tuu lihtsähe niiüldäq tuim väüdeq, et nii um, et puid umgi vaia alaq pandaq. A ku ma ütle tuu "gi" ülespoolõ jõnksugaq, sis kõlas tuu kuigi targutlõvalt, et näet, maq tiiä, et umgi aig ja maq teile tuud noq ütle.
Edimäst kõrda ma panni umbõs määnestki säänest intonatsiooni-muutust tähele jo kunagi ammuq soomõ keeleh. Ma ei tiiäq, mis lausih, a no umbõs sääntsih ku
"Tottakai tää asia tulee lopettaa."
Kimmähe olliq külh hoobis tõõsõq lausõq, a tulõ-õi inämb miilde. Vai ku võttaq sama lausõq ku võro keeleh, sis:
"Onkin aika laittaa uuniin puita."
Suumlasõq, kuis um, kas kõlas loomuligult vai mitte? Ja kas kõlas ka kuigi nigu vähä targutlõvalt? Vai kuis?
No eesti keeleh um kimmähe kah sakõstõ samma asja võimalik kuul-daq, kuiki hüvvi näütüt kõrraga miilde tulõ-õi. A ku võttaq sama lausõq,
"Ongi paras aeg alla panna puid."
sis kuis olnuq, kas kõlas teile ka eesti keeleh tutvahe? Ja kas ka targutlõvalt? Vai kuis?
Sõbraq keeletiidläseq, kas tiiq kah olõt säänest "targutlõvat" üles-alla intonatsiuuni võro vai eesti vai soomõ vai inglüse vm keeleh tähele pandnuq ja kas taast um ka kiäki midägi kirotanuq?
Sullõv
